Malakas na sampal ang natikman ng sikat na aktor mula sa isang kontrobersyal na personalidad, pero piniling manahimik ng aktor para hindi na lumaki ang isyu.
Nagalit ang kontrobersyal na personalidad sa sikat na aktor dahil nakipagrelasyon ito nang sabay sa dalawang aktres na malapit na kaibigan niya.
TWO-TIMING ACTOR
Isa sa mga naagrabyadong aktres ang nagsumbong sa palaban na personalidad at nagsabing may kahati siya sa puso ng aktor na hindi naging matapat sa kanilang relasyon.
Nagalit ang kilalang personalidad dahil bukod sa naawa siya sa kaibigang aktres, malapit din sa kanya ang aktres na karelasyon din ng aktor.
Kasiraan sa aktor ang pananampal ng matapang na personalidad.
Kung magsasalita o maghahain ang aktor ng reklamo, tiyak na magkakaroon ito ng epekto sa kanyang showbiz career at pagkatao.
Pero marami ang nakaalam sa inililihim na karanasan ng aktor dahil ang palaban na personalidad mismo ang nagkukuwento at nagmamalaki sa mga kaibigan tungkol sa pananampal niya.
Ang maipagtanggol ang dalawang kaibigan na aktres ang intensyon ng matapang na personalidad kaya gumamit siya ng karahasan upang maturuan ng leksyon ang aktor na namangka sa dalawang ilog.
