Boy Abunda (left) on reunion with Kris Aquino (rightmost): “Ako ay naging emosyunal, sinabi rin naman ito ni Kris, I was emotional. Pinipigilan ko pong hindi umiyak pero naiyak po ako, na-miss ko si Kris.”
Hindi itinanggi ng TV host na si Boy Abunda na naging emosyunal ang pagkikita nila ng dati niyang alaga at matalik na kaibigan na si Kris Aquino.
Noong October 27, 2023 (Philippine time), ibinahagi ni Kris sa Instagramang ilang kuhang larawan nila ni Boy nang dalawin siya ng talk show host sa kanyang inuupahang bahay sa Orange County, Los Angeles, California.
Pero paglilinaw ni Boy sa Fast Talk With Boy Abunda nitong Martes, November 7, noong October 25 ang eksaktong petsa ng pagkikita nila ni Kris.
Dito rin niya ikinuwento kung gaano siya kasaya na muling makita at makausap nang personal si Kris mula nang pumunta ito sa US para sa kanyang pagpapagamot.
“It was a happy, beautiful reunion.
“Dahil matagal kaming hindi nagkita ni Kris, text lamang at [sa] telepono lang kami nagkakausap. It was different seeing her.
“Tatanggapin ko po, ako ay naging emosyunal. Sinabi rin naman ito ni Kris, I was emotional.
“Pinipigilan ko pong hindi umiyak pero naiyak po ako, na-miss ko si Kris,” pagbabahagi ni Boy.
KRIS AQUINO’S HEALTH
Dahil sa tagal nilang hindi nagkita ay marami-rami rin daw silang napagkuwentuhan, kabilang na rito ang kasalukuyang kalagayan ni Kris.
Ani Boy, “May lumalabas pong balita na Kris will stay in the U.S. for another fifteen or eighteen months. Ang dahilan po nun ay dahil yung meds [medicine] po na kailangan ni Kris ay available lamang doon at saka yung accessibility to the doctors ay kailangan.
“Kaya po, yun, kaya she has to stay, mga ganun.
“Nobody’s sure. We are praying na sana mapaikli pa ito para makasama po natin si Kris dito sa Pilipinas.”
Dagdag niya, “I just missed her and I am hoping na one of these days, makita natin ang aming pag-uusap.
“Alam niyo po, one of the reasons why yung aming maikling pag-uusap ni Kris, yung kanyang health condition [ay] pabagu-bago, nagbabago. Kaya sabi nga niya, ‘Boy, baka hindi accurate.’
“Kaya hayaan niyo po, we will be giving you updates sa mga darating na panahon.”
Biro naman daw ng bunsong anak ni Kris na si Bimby, habang nag-uusap at nagkukumustahan sila, pakiramdam nito ay bumalik siya sa edad na apat kung saan pinapanood niya ang ina at si Boy sa kanilang sikat na talk shows noon sa ABS-CBN— ang The Buzz at Aquino and Abunda Tonight.
Saad ni Boy, “Sabi ko nga kay Kris, ‘Kris, magpagaling ka. Gagawa tayo ng palabas.'”
Ipinaabot din ni Boy ang pasasalamat ni Kris sa lahat ng patuloy na nagdarasal sa kanyang paggaling.
“She wanted me to let you know na sobra ang kanyang pasasalamat na hindi niya kinakailangang kaibigan, kakilala, katrabaho o kamag-anak, but alam niya maraming… nagdarasal ang lahat, maraming nagdarasal para sa kanya.
“She [Kris] said, ‘Boy, pakisabi maraming, maraming, maraming salamat.'”
Kalakip pa nito ang kahilingan daw ng tinaguriang Queen of All Media na bukod sa kanya ay ipagdasal din ang mga taong nasa tabi niya at nag-aalaga sa kanya.
Sabi ni Kris, “Sana hindi lang ako ang ipagdasal.
“It’s also nice if people can pray for the people around me. My children, my sisters.’”
Sabi naman ni Boy, “Doon ko na-realize na tama nga naman. When we pray for somebody who doesn’t feel well, let’s also pray for people who are taking good care of the people who are not feeling well.”
Dagdag pa ni Boy, walang dapat ipag-alala ngayon ang mga tagahanga ni Kris dahil inaalagaan siya nang maayos ng kanyang mga doktor, nurses, at mga anak na sina Josh at Bimby.
