Nagsalita ang box-office director na si Cathy Garcia-Sampana hinggil sa kumakalat na haka-hakang in-unfollow niya sa Instagram ang aktor na si Daniel Padilla.
Ito’y sa gitna ng usap-usapang hiwalay na umano ang magkasintahang Daniel at Kathryn Bernardo.
Nitong Martes, November 21, 2023, napansin ng mapanuring netizens na wala na sa following list sa Instagram account ni Direk Cathy ang IG account ni Daniel.
Gayong si Kathryn naman ay nananatiling pina-follow pa rin ng direktor.
Kung susuriin naman ang IG account ni Daniel ay makikitang nasa following list pa rin niya si Direk Cathy.
Dahil dito, binigyan ng ibang pagkakahulugan ng netizens ang umano’y pag-unfollow ni Direk Cathy kay Daniel.
Kataka-taka raw kasi ito lalo na’t malapit sa isa’t isa sina Direk Cathy, Daniel, at Kathryn matapos nitong idirek ang limang proyektong pinagbidahan ng celebrity couple.
Si Direk Cathy ang direktor ng tatlong teleserye ng KathNiel sa ABS-CBN—Got to Believe (2013), Pangako Sa ‘Yo (2015), at La Luna Sangre (2017)—at dalawang box- office films na She’s Dating The Gangster (2014) at The Hows of Us (2018).
Sa Instagram nitong Miyerkules, November 22, tuluyan nang binasag ni Direk Cathy ang kanyang pananahimik para linawin ang umano’y pag-unfollow niya kay Daniel.
Ipinost nito ang screenshot ng mga netizen kung saan makikitang hindi lumabas ang IG account ni Daniel nang i-search nila ito sa following list ni Direk Cathy.
Ayon sa direktor, wala talagang makikitang Daniel sa kanyang following list dahil hindi naman niya pina-follow ang aktor.
Kalakip nito ang pakiusap na huwag na siyang idamay sa isyu dahil wala siyang alam sa kontrobersiyang kinahaharap ngayon nina Daniel at Kathryn.
Mababasa sa caption ni Direk Cathy (published as is): “Mga bakla huwag niyo na po ako idamay dito.
“Wala talaga kayong makikitang supremo dj sa followed ko kasi hindi ko naman siya fina-follow noon pa. Di ko alam totoong account niya kasi.
“20 nga lang fina follow ko e. Noon pa. Kaya Huwag na po nating gawing issue.
“Wala nga akong alam inangkupo.
KATHRYN-DANIEL BREAKUP RUMORS
Noong November 8, 2023 nang magsimulang maintriga ang relasyon nina Kathryn at Daniel matapos ibinalita ni Ogie Diaz sa kanyang YouTube vlog ang usap-usapang hiwalay na umano ang celebrity couple.
Dawit dito ang pangalan ni Andrea Brillantes, na ayon kay Ogie ay nali-link kay Daniel at pasikreto pa umanong nagkikita ang dalawa.
Bagamat kalaunan ay binawi ito ni Ogie nang sabihin niyang hindi sa kanya unang nanggaling ang tsismis.
November 10, pasimpleng pinabulaanan ni Daniel ang kumakalat na espekulasyon sa kanila ni Kathryn, nang ibahagi niya sa kanyang Instagram story ang video ng nobya sa Preview—kung saan ang aktres ang online cover ngayong buwan.
Sa video na in-upload ng Preview sa Instagram, makikita si Kathryn na inaayusan.
Makikita rin na ni-like ito ni Daniel bago niya ilagay sa kanyang Instagram Story.
Hanggang noong November 14, naispatang magkasama sina Kathryn at Daniel nang dumalo sila sa event ng isang luxury watch brand.
Mismong si Kathryn pa ang nag-repost sa kanyang Instagram Stories ng ilang litrato nila ni Daniel kasama ang ilang kaibigan.
Nag-viral din ang mga video na kuha sa after-party kung saan makikita sina Daniel at Kathryn na magkasamang sumasayaw sa dance floor.
KATHRYN AND ANDREA UNFOLLOW EACH OTHER ON INSTAGRAM
Nitong November 19, 2023, muling napansin ng mapanuring netizens na tuluyan nang in-unfollow ni Andrea si Kathryn sa Instagram.
Nangyari ito ilang araw matapos madiskubre ng KathNiel fans, noong November 17, na hindi na pina-follow ni Kathryn ang young actress, pero si Andrea ay nananatiling nasa following list niya si Kathryn.
Kung susumahin, parehas na ngayong hindi pina-follow nina Kathryn at Andrea ang isa’t isa.
KATHRYN’S CELEBRITY FRIENDS UNFOLLOW DANIEL, ANDREA ON INSTAGRAM
Samantala, bukod kay Direk Cathy ay napansin din ng netizens na naka-unfollow na kay Daniel at Andrea ang ilang malalapit na kaibigan ni Kathryn.
Ayon sa mga netizen, sina Chie Filomeno at Robi Domingo ay in-unfollow na sina Daniel at Andrea sa Instagram.
Habang sina Miles Ocampo at Loisa Andalio ay tinanggal na rin nila sa following list nila si Andrea.
