Nagdadalamhati ngayon ang showbiz industry sa biglaang pagpanaw ng multi-awarded veteran actor na si Ronaldo Valdez.
Sumakabilang buhay si Ronaldo, sa edad na 77, nitong Linggo ng hapon, Disyembre 17, 2023.
Kinumpirma ito ng anak niyang si Janno Gibs nang maglabas ito ng maikling pahayag sa Instagram ngayong Lunes, December 18.
Mababasa sa post ni Janno, “It is with great sorrow that I confirm my father’s passing.”
Kasunod nito ang pakiusap ni Janno na irespeto ng publiko ang privacy ng kanilang pamilya sa oras na ito ng kanilang pagdadalamhati.
Aniya, “The family would like to request that you respect our privacy in our grieving moment.
“Your prayers and condolences are much appreciated.”
Ang Quezon City Police District (QCPD) ang unang nagkumpirma sa pagkamatay ni Ronaldo, ngunit ang sanhi ng pagpanaw ng aktor ay hindi pa naisasapubliko.
Samantala, sa comments section ng post ni Janno ay bumuhos ang pakikiramay ng ilan sa mga nakatrabaho, kaibigan, at ilang malalapit kay Ronaldo.
KATHRYN BERNARDO
Idinaan naman ni Kathryn Bernardo sa sunud-sunod na Instagram Stories ang pangungulila niya sa itinuturing niyang “Lolo Sir.”
“Lolo Sir” ang nakasanayang tawag kay Ronaldo ng bagong henerasyon dahil sa karakter na ginampanan niya sa 2 Good 2 Be True, ang romantic-comedy series ng Kapamilya Channel na pinangunahan ni Kathryn at dating nobyo na si Daniel Padilla.
Sa sunud-sunod na Instagram Stories, muling binalikan ni Kathryn ang masasayang alaala nila ni Ronaldo sa taping ng 2 Good 2 Be True, maging ang pagsuporta ng beteranong aktor sa kanya sa premiere night ng pelikulang A Very Good Girl.
DIMPLES ROMANA
Sa pamamagitan ng throwback pictures, inalala naman ni Dimples Romana ang kabaitan ni Ronaldo sa kanya makaraang magkasama sila sa isang episode ng drama anthology na Maalaala Mo Kaya.
Pagbabahagi ni Dimples, nabago ang kanyang pananaw sa buhay nang makasama at makatrabaho niya ang beteranong aktor.
Mababasa sa caption ni Dimples, kalakip ang throwback pictures nila ni Ronaldo (published as is), “May mga taong sadyang makakapagpabago ng pagtingin mo sa buhay. Tatatak sila sayo hanggang sa huli at kailanman ay hindi mo sila malilimot. Ikaw yun sa akin. At sa napakarami pa naming nagmamahal sayo Lo.
“2009 was a rough year for me both as a person and as an actress. It was a time when I felt lost and broken. Spent and exhausted.
“Dalawang araw lang ng taping namin ng MMK episode na ito directed by @henrykingq with Nay @rodacd1 and already, my faith in life, love and my craft was renewed. You were always full of joy, of life and gratitude, your smile lit up the set.
“Your warmth melted everyone’s hearts. You have that gift. And I will always be grateful po for all the learnings, the laughter and the lessons that came with lots of smiles and realizations. And super tight hugs.”
Labis daw ang kanyang kalungkutan sa pagkawala ni Ronaldo ngunit pipilitin daw niyang maging matatag kagaya ng itinuro sa kanya noon ng aktor.
Ani Dimples, “My heart is broken but will never be disheartened. For you Lolo taught me to brave the huge waves of life with a spirit of a warrior whose armor is not made of steel but is made of love. The kind that endures all and conquers even the darkest of days.”
Sa huli, sinabi ni Dimples na pumanaw man si Ronaldo, ang alaala at legasiya nito bilang isang magaling na aktor ay hindi maglalaho kailanman.
“Salute to one of the greatest actors of all time for me. A man who knew how to value not only his work but more importantly every single other person on and off set.
“Mahal ka namin Lo. Mahal na mahal. Pahinga na po. Patuloy ka naming mamahalin at titingalain.”
VILMA SANTOS
Throwback picture din ang in-upload sa Instagram ni Vilma Santos para bigyang pugay si Ronaldo, matapos nilang magkatrabaho at magkasama sa classic film na Karma noong 1981.
“Our condolences and prayers. You will be missed. Rest In Peace, my friend!,” saad ni Vilma.
CHANDA ROMERO
Maging an aktres na si Chanda Romero ay hindi rin napigilang malungkot sa pagkawala ni Ronaldo.
Pagbabahagi ni Chanda sa kanyang Instagram post, isa sa paborito niyang leading man si Ronaldo dahil sa pagiging gentleman at sweet nito.
Saad ni Chanda sa kanyang post (published as is), “Ron… One of my favorite leading men… a treasure in the Philippine movie industry… a perfect gentleman… with a sweet and happy disposition and wicked wit…Rest well, my dear friend.
“You will be missed. Sorely missed.
“I’m sure you’re already bantering with Danny Zialcita now. Hugs to him too.”
Ang Danny Zialcita na tinutukoy ni Chanda ay ang direktor sa classic film na Karma (1981) na pinagsamahan rin nila noon ni Ronaldo.
GARY VALENCIANO
Hindi man pinalad si Gary Valenciano na makatrabao si Ronaldo, labis-labis daw ang paghanga niya rito dahil sa husay nitong aktor at pagiging mabuti nito bilang tao.
Hiling ng Kapamilya singer, ang kapayapaan ng kaluluwa ni Ronaldo at paghilom ng puso sa mga naiwan nitong pamilya at mahal sa buhay.
Mensahe ni Gary, “You were one person who I loved to watch. Your authenticity never failed to move me.
“Thank you sir Ronaldo Valdez. I never had a chance to work much with you but in those few moments I spent talking with you, it made me feel blessed to know that I got to meet someone like you.
“Rest in His peace sir. I know His embrace will always keep you smiling.”
